O alumnado de 3º da ESO converteuse nas últimas semanas en auténtica compañía teatral dentro da materia de Oratoria, guiados pola súa profesora Coral. Con motivo da celebración do Día do Teatro, o 27 de marzo, puxeron en marcha un proxecto creativo no que a palabra, a expresión e o traballo en equipo foron protagonistas.
Ao longo do proceso, os rapaces e rapazas encargáronse de elaborar os seus propios guións, dando forma a historias pensadas especialmente para o público máis novo do centro. A biblioteca escolar transformouse no seu espazo de creación e ensaio, onde puideron experimentar coa voz, os movementos e a posta en escena, adaptándose ao lugar e explorando como transmitir mellor as súas ideas.
Este traballo non só lles permitiu desenvolver habilidades comunicativas e expresivas, senón tamén reflexionar sobre como conectar co público infantil, coidando tanto o contido como a forma das súas representacións.
As obras foron finalmente presentadas despois das vacacións de Semana Santa, momento no que o alumnado máis pequeno puido gozar destas representacións cheas de ilusión, creatividade e esforzo.
Unha experiencia moi enriquecedora que pon en valor o teatro como ferramenta educativa e a biblioteca como un espazo vivo onde aprender, crear e compartir.
No hay comentarios:
Publicar un comentario