CONMEMORACIÓN E PODCAST DO DÍA DAS LETRAS GALEGAS

  As Letras Galegas 2026: homenaxe a Begoña Caamaño

O ano que acaba de alborexar trae consigo unha nova celebración das Letras Galegas, dedicada nesta ocasión á escritora, xornalista e activista Begoña Caamaño, unha figura fundamental da cultura galega contemporánea. Coa súa obra e o seu compromiso coa lingua e coa igualdade, Begoña deixou unha pegada fonda na literatura e na sociedade galega.

Dende o noso centro quixemos sumarnos a esta homenaxe dun xeito moi especial. O alumnado de 5º de Educación Primaria preparou un podcast no que descubrirán a súa vida, a súa traxectoria e algunhas das achegas máis importantes da autora. Un traballo realizado con moita ilusión, creatividade e ganas de seguir aprendendo sobre as nosas letras e a nosa cultura.

Con este proxecto, ademais de coñecer mellor a figura de Begoña Caamaño, o alumnado achegouse ao mundo da comunicación e do podcast, converténdose por uns días en auténticos xornalistas e locutores. Agardamos que desfrutedes tanto escoitándoo como eles preparándoo!

IMAXE CREADA  CON IA (CHAT GPT)

https://go.ivoox.com/rf/173693649

Ademais do podcast realizado polo alumnado de 5º de Educación Primaria, no noso centro seguimos celebrando as Letras Galegas con diferentes actividades para achegarnos á lingua e á cultura dun xeito creativo e participativo. Entre elas destacou o obradoiro de chapas, no que o alumnado elaborou deseños propios para esta conmemoración, incorporando frases na defensa do galego, imaxes con gran peso simbólico para a nosa lingua e creacións orixinais cheas de cor e significado.

 Tamén compartimos recomendacións lectoras a través do noso Libroflix, cunha selección de obras de Begoña Caamaño e doutros libros en galego para seguir descubrindo historias, voces e emocións na nosa lingua. Porque as Letras Galegas non son só unha homenaxe ao pasado, senón tamén unha celebración dunha lingua viva, en constante movemento, que cambia, medra e continúa acompañándonos cada día.