Comezamos este novo curso con moita ilusión e con algunhas novidades que pouco a pouco van transformando a nosa biblioteca nun espazo aínda máis acolledor, práctico e especial para toda a comunidade educativa.
Unha destas novidades naceu grazas ao traballo e á creatividade da profesora Gladis xunto co alumnado de 4º da ESO na materia de dixitalización. A partir do deseño realizado conxuntamente, e aproveitando os recursos da dotación de Polos Creativos, puxemos en marcha a nosa cortadora láser para facer realidade unha idea que levabamos tempo imaxinando.
E xa podemos dicir que a nosa biblioteca ten novos protagonistas!
Contamos agora con separadores por letras que nos axudan a organizar e localizar os libros de maneira máis visual e sinxela, nos que o noso querido Camaleo é o protagonista.. Ademais, creamos tamén os separadores das diferentes categorías da CDU.
Deste xeito, a nosa mascota acompáñanos tamén na organización dos fondos da biblioteca e axúdanos a descubrir que detrás de cada número, cada letra e cada estante hai un novo mundo por explorar.
O equipo de biblioteca segue traballando para mellorar, transformar e facer medrar a nosa biblioteca, sempre coa intención de que sexa un lugar para ler, aprender, investigar, crear, compartir e, sobre todo, gozar.
Porque a nosa biblioteca está viva… e Camaleo xa está preparado para acompañarnos nesta nova aventura!
No hay comentarios:
Publicar un comentario